【初老症】
最近突然驚見自己有法令紋，雙眼又開始鬆弛
皮膚狀態急劇變差，有種一夜白頭嘅感覺。
於是呢兩日去咗行護膚品專櫃，
以前我會揀價錢平嘅牌子，眼霜過三百我都唔想買
（btw我都係近兩年先用眼霜）但就係今日！
我買咗枝五百蚊嘅眼霜！（#不要讓麥仔看到呢句）
買完之後我突然有種感覺，我真的要老了。
然後我腦中出現一個畫面
就係《我可能不會愛你》入面，第一集一開場
林依晨喺百貨公司不停被一隻叫「時間」嘅怪獸追住跑⋯⋯
exact7ly係我今日嘅場景。唉
btw當日睇呢套劇睇咗兩次，兩次都係睇愛情
為李大仁而喊為Maggie而抓狂⋯⋯
但如果今日再睇，我諗我係為程又青講嘅「初老症狀」而喊⋯⋯
//
廿五歲之前，聽過好多人話「女人廿五歲皮膚就開始老化⋯⋯」，「女人廿五歲之後就老得好快⋯⋯」，當時仲係青春少艾嘅我覺得呢班人真係唯恐天下不亂，老一歲咋喎會唔會咁誇張？何況二十五其實都好後生啫。轉眼去到廿六歲嘅尾聲，我開始感受到當日佢哋講嘅說話，廿五歲之後，我身心都好似起了變化。
儘管自己唔願意承認，但係廿五歲之後身體的確係唔再年輕，以前通宵一晚，第日都可以好似無事發生過一樣。依家通宵一晚，兩日後都仲覺得精神不振⋯⋯以前皮膚狀態算幾好，求其搽啲面霜就已經足夠，買護膚品以價錢為先，防皺緊緻功能完全唔需要。到依家買護膚品重要過化妝品，照鏡發現皮膚好似突然鬆弛出皺紋，功效同成份變咗最優先考慮，寧願畀多啲錢去買成份天然啲，功效好啲嘅產品，因為好清楚錢無咗可以搵，但係青春無咗真係追都追唔到。
以前自覺青春無限，時間好多，多到可以去任性虛耗，所以想做咩就會去做，想轉工就轉，想裸辭就裸辭，想愛就愛。到依家發現自己已經虛耗太多時間，三十快到都仲係事業無成，開始覺得時間追住自己跑，身邊朋友嘅成功亦都變成一種警號，提示住自己都應該要認真對待自己嘅人生。
我知，好多過咗三十歲嘅人睇到應該都會取笑我，廿六歲算什麼？佢哋會話「三十歲其實無咩，當你過咗之後，你會發現世界其實都無咩改變」。係，三十歲只係一條線，世界唔會係一日之間徹底改變。但我覺得三十歲就好似一個中轉站，你完成咗一段叫青春嘅旅程之後又要準備去下一段旅程，三十歲就好似一種結束同另一種開始。令人最怕嘅嘅唔係下段旅程有幾兇險，而係最怕自己喺青春呢段旅程留下太多遺憾。
IG: hkgirlfriend
https://www.instagram.com/hkgirlfriend/
Search